អ្នកចាំទីដៃស្អិតរបស់ក្រុម Roma នឹងរង់ចាំ Real Madrid

រដូវកាល ២ឥ១៧/១៨ គឺជារដូវកាល​ដ៏​អច្ចារ្យ​សម្រាប់​អ្នកចាំទី​របស់ ក្លឹប​ Roma នោះគឺកីឡាករ​ Alisson Becker ដែល​ហាក់​មាន​ការ​រះឡើង​ដ៏គួរ​ឲ្យចាប់អារម្មណ៍ ហើយ​គេត្រូវ​បាន​រាយការណ៍​ថា មាន​ក្លឹប​ជាច្រើន​កំពុងតាម​ចែចូវ ដែលរួមមាន Liverpool, Chelsea និង​ Paris Saint-Germain ជាដើម។

ប៉ុន្តែកីឡាករជម្រើសជាតិប្រេស៊ីលរូបនេះចង់ចូលរួម Real Madrid ជាងគេ ថ្វីបើបច្ចុប្បន្នក្លិបយក្សអេស្ប៉ាញមួយនេះមិនទាន់មានគ្រូ ក្រោយការចាកចេញរបស់ Zinedine Zidane ក៏ដោយ។

ការចាកចេញរបស់ Zidane ជារឿងល្អមួយសម្រាប់ Alisson ចំពោះក្ដីស្រមៃរបស់គេក្នុងការផ្លាស់ទៅ Bernabeu ព្រោះថា Zidane ពេញចិត្ត Keylor Navas និងមិនចង់បានអ្នកចាំទីម្នាក់ទៀតមកជំនួសនោះទេ ទោះបីថ្នាក់ដឹកនាំក្លិបចង់បានក៏ដោយ។

ម្យ៉ាងទៀត Roma ត្រូវការប្រាក់ចំណូលមួយចំនួនមុនថ្ងៃទី១ខែកក្កដាឆ្នាំ២០១៨ ដើម្បីតម្រូវតាមច្បាប់ Financial Fair Play។ Alisson ពីដំបូងមានតម្លៃ៥០លានអឺរ៉ូ ប៉ុន្តែឥឡូវ Roma ជឿថាអាចលក់បានថ្លៃជាងមុន គឺប្រហែល៦០លានអឺរ៉ូ៕

បើទោះជាបែបណាក្តី ពេល​វេលា​សម្រាប់ Alisson ក៏មិនសល់​ច្រើន​ប៉ុន្មាន​ដែរ ហើយ​បើ​ងាក​ទៅ​មើល​ Real Madrid វិញ ពេល​នេះ​ដូច​មិន​មាន​អ្វីអាច​ជួយបាន​ប៉ុន្មាន​ទេ​ព្រោះ​ថា​ ពួកគេ​មិន​ទាំងទាន់​រក​បាន​គ្រូប​បង្វឹក​​សម្រាប់​ក្លឹប​សម្រាប់​រដូវកាល​ថ្មីនេះផង​នោះ។

ទោះជា​យ៉ាង​ណាក្តី កីឡាករ​រូបនេះ​នៅ​តែ​ចង់​រង់​ចាំ​បន្តិច​សិន ព្រោះ​ថា Real Madrid គឺជាទីសុបិន​របស់គេ៕